Staðið er fyrir þessari söfnun til þess að reyna að bjarga ungu hestunum í Borgarbyggð frá sláturhúsi ef til vörslusviptingar kemur innan skamms. Í síðustu viku (18/10/2022) voru 13 ungir og vannærðir hestar teknir af eigendum sínum og sendir í sláturhús af því að MAST hafði engin úrræði fyrir þá. Ungir hestar sem hefði verið hægt að fóðra til heilsu aftur í umsjón nýrra eigenda. Þetta er því miður kerfið sem við búum við, það tíðkast ekki að stjórnvöld skaffi "umönnun" við þessar aðstæður.
Af þeim hestum sem eftir eru hjá sömu eigendum eru 10 ungir hestar sem MAST metur að séu í "viðkvæmu ásigkomulagi" og gætu átt sömu örlög innan skamms! Tilgangur söfnunarinnar er að safna fjármunum og undirbúa úrræði þannig að hægt sé að kaupa þessi dýr til lífs ef/þegar að vörslusviptingu kemur og fóðra þau til heilsu aftur í vetur.
MAST hefur lagaheimild til að selja dýr í þessum aðstæðum til lífs, þó það tíðkist ekki sökum flækjustigs og tímans sem það tekur. Þess vegna þarf að safna fjármunum og undirbúa þetta úrræði áður en að næstu vörslusviptingu kemur. Mjög líklegt er að til hennar komi á næstum dögum/vikum.
Hversu mörgum hestum verður hægt að bjarga fer eftir því hversu mikið fé safnast til framfærslu þeirra.
Fjármunir sem safnast fara í:
- Kaup á hestunum (rétt ríflega það verð sem hefði fengist í sláturhúsi)
- Hesthússpláss + fóðrun (gott hey, fóðurbætir, ormalyf, saltsteinar)
- Dýralæknakostnaður eftir þörfum
Áætlaður framfærslukostnaður fyrir hvern hest er 30.000 kr. á mánuði fram í miðjan júní þegar gras fer að spretta. Hægt er að styrkja verkefnið í eitt skipti eða mánaðarlega fram á sumar, en það mun taka veturinn að koma þessum hestum til góðrar heilsu.
Allir sem styrkja verkefnið munu geta fylgst með framvindunni í máli og myndum í FB hóp verkefnisins.
Hægt er að taka að sér framfærslu á ákveðnum hesti (30þ á mán. í 6-7 mán. eftir því hvenær til vörslusviptingar kemur). Myndir, upplýsingar um framvindu og heimsókn fyrir/eftir fylgja ef áhugi er fyrir því.
----
Ef þú vilt styrkja með eingreiðslu er hægt að nota AUR eða KASS.
Símanúmerið 611 1212 er stillt inn á söfnunarreikninginn.
Einnig má leggja inn á 537-14-651188 / kt. 290276-4039
For donors without a creditcard, IBAN: IS 8505 3714 6511 8829 0276 4039
----
Ef þú vilt persónulega kaupa hross úr hópnum, skuldbinda þig til að skaffa því góðar aðstæður og koma því til heilsu á þinn kostnað skaltu senda póst á [email protected] sem allra fyrst!
Ef þú vilt gefa verkefninu aðföng eða vinnu, t.d. hey (SV horn) dýralæknavinnu, hófklippingar eða annað sem þú heldur að komi að gangi í vetur, sendu þá endilega póst á [email protected]
---
Ef svo ótrúlega færi að MAST myndi hafna þessu úrræði ef/þegar til vörslusviptingar og samt senda hestana í sláturhús, munu allir sem styrktu verkefnið geta valið hvort þeir fái endurgreitt eða að framlag þeirra renni í sjóð til styrktar öðru sambærilegu verkefni í framtíðinni.
Hlý kveðja,
Birta Flókadóttir
Bakhjarlar hrossa í Borgarbyggð